الجمعة، 25 مايو، 2012

_ 133 _ أحمد شفيق أو محمد مرسى .. " حَل من إتنين "

بما أن الاعادة فى إنتخاب الرئيس هتكون بين شفيق و مرسى .... يبقى أمامنا "حَل من إتنين"  يـــا تتم الانتخابات أو تتلغى لآى طعن  دستورى او قانونى " وده مستبعد".... إذاَ  إتلغت الانتخابات كلها لاى سبب دستورى او قانونى  يبقى " خير و بركة "

و إذاَ  عملوا الاعادة  ... يبقى أمامنا "حَل من إتنين" يـــــــا إماَ  يفوز محمد مرسى "مع انه هيبقى رئيس بالصدفة أو جابوه من على الرف ... أو يفوز احمد شفيق و يرجع بقى ينتقم من الجميع،.. إذاَ فاز محمد مرسى يبقى " خير و بركة "

نستحمل الاخوان و حركات التكويش و نعافر معاهم شوية لحد ما يفوقو و يبطلوا غطرسة،... و إذاَ فاز أحمد شفيق يبقى أمامنا "حَل من إتنين" يـــــــا  يبقى رئيس محترم لكل المصرين و يبطل تهديدات و هرتلة أو .. ينفذ تهديداته و ينتقم من الثورة و الثوار... إذا بقى رئيس محترم " وده طبعاً مستبعد جداً"  هيبقى " خير و بركة " 

و إذاَ  نفذ تهديداته و انتقم مننا هيبقى أمامنا "حَل من إتنين" يـــــــا إماَ  يعلقنا فى التحرير نفر نفر  ... أو يعتقلنا ويرمينا فى السجون،... إذاَ علقنا فى التحرير .. ثوار واخوان وليبرالين و يسارين و اشتراكيين و حتى بتوع البطاطا و بتوع الشاى .... يبقى " خير و بركة "

على الاقل أهالينا يعرفوا مكان جثثنا و ترتاح نفوسهم و يدفنونا، وحزب الكنبة يهيّص و يشترى كنبة جديدة  ... و إذاَ  إعتقلنا شفيق و رمانا فى السجون  يبقى أمامنا  "حَل من إتنين"  يـــــــا إماَ  يعتقلنا فى سجون تابعة للداخلية أو  يلقحونا  فى السجن الحربى" عند أسياده "  إذاَ حطنا فى سجون الداخلية يبقى  " خير و بركة "

 اهلنا هيعرفوا على الاقل يزورونا و يجيبوا لنا عيش و حلاوة و سجاير.. و إذاَ   رمونا فى غياهب السجن الحربى.....  يبقى أمامنا  "حَل من إتنين" يــــــا إماَ نقع فى ايد ظباط السجن الحربى العاديين أو  نقع فى ايد اللواء حمدى بدين بتاع الشرطة العسكرية إذاَ وقعنا تحت ايد ظباط السجن الحربى  العادين يبقى " خير و بركة "

 و إذاَ وقعنا فى ايد حمدى بدين السفاح  يبقى أمامنا  "حَل من إتنين"  يـــــــا إماَ  يلفق لنا قضايا بمحاكم عسكرية سريعة أو .....لا يعلن أى شىء عننا  ويكتم علينا،.... إذاَ حاكمنا عسكرياً و رزعنا احكام سجن بالسنيين الطويلة يبقى " خير و بركة "

و إذاَ  كَتِم علينا فى السر .... و الدبان الازرق موش هيعرف لنا سكة يبقى أمامنا "حَل من إتنين" يـــــــا إماَ  هيضربنا بالنار و يرمى جتتنا فى الصحراء زى الكلاب  أو .....يجيب لنا أحمد شفيق "الريس بقى"  بنفسه عشان يتشفى فينا .. ويحقق معانا بنفسه .... إذاَ ضربنا السفاح حمدى بدين  بالنار و رمانا فى الصحراء و تحللت جثثنا يبقى " خير و بركة "

و إذاَ  جاب احمد شفيق يحقق معانا و ينتقم مننا  يبقى أمامنا "حَل من إتنين" .... يــــــا إماَ يعذبنا بنفسه و يقلع لنا ضوافرنا و يخزق لنا عنينا  أو .. يعمل رئيس حنون و ديموقراطى و مدنى و بتاع ربنا و يعفوا عننا بعد ما يأدبنا شوية ... إذاَ عذبنا و قلع ضوافرنا و خزق عنينا يبقى " خير و بركة "

و إذاَ  مثل دور الرئيس بتاع ربنا و العطوف على ابناء شعبه المخطئين و المشاغبين و اعطانا عفو رئاسى مشروط  يبقى أمامنا  "حَل من إتنين"  يــــــا يسلمنا لاهالينا و ياخد تعهد عليهم أننا منهوبشى ناحية ميدان التحرير تانى  أو .....يسلمنا للاخوان المسلمين إذاَ سلمنا لاهالينا يبقى " خير و بركة "

و إذاَ  سلمنا للاخوان المسلمين  يبقى أمامنا  "حَل من إتنين"  يــــــا يعملوا محاولة يجندونا و نبقى تبعهم أو ..... يعملوا معانا صفقة إذاَ جندونا و خلونا اخوان زيهم يبقى " خير و بركة "

على الاقل نعرف نطول اللى عايزينه لما الظروف تسمح و إذاَ  عملوا معانا صفقة يبقى أمامنا  "حَل من إتنين"  يــــــا ينفذو اتفاق الصفقة فعلا  أو ..... يضحكوا علينا و ياخدوا اللى عايزينه مننا و بعدين ينقلبوا علينا إذاَ نفذوا الاتفاق و الصفقة " و ده مستبعد كالعادة " يبقى " خير و بركة "

و إذاَ  ضحكوا علينا  يبقى أمامنا  "حَل من إتنين"  يــــــا  نعمل ثورة جديدة ضدهم و ننزل الميدان تانى أو ................... نَشكُوهم جميعاً.... الاخوان ... والعسكر .. وشفيق .. و الفلول .. و حزب الكنبة ... سنشكوهم إلىَ مِن لهُ ألامر كُله ... مَالك المُلك .. مَن بيدهِ كُل شىء



عمــــر المصـــــــرى

Twitter:  @Omar_Almasry

 43000

أعتذر لمرور اسبوعين ولم أنشر خروشة جديدة، لست كسولاً لكن الاحداث حُبلى بالكثير ..نترقب و سنرى
عمر، القاهرة 10 يونيو2012














إجمالي مرات مشاهدة الصفحة

أرشيف المدونة الإلكترونية