الأحد، 28 مارس، 2010

الخروشة السادســـة .. عم انيس منصـــور




الخروشة السادســـة .. عم انيس منصـــور
بما ان الجدع شريكى اللى معايا فى الهبابة الخروشات عطلان من اسابيع لاسباب فنية  ... فلازم بقى اشتغل انا هنا شوية ونحلل القرش اللى بناخده منكم يا قوم ... جتنى فكرة وانا بقرأ مواقف عم انيس منصور .. الراجل ده صعب تحدد له ارض او بيت او  فهم ... راجل غريب تحس انه بيستمتع وهوا بيلاعبنا .. مرة معانا  ومرة ضدنا ... مرة جميل ومرة قبيح ... مرة تحس انه بيحب الستات قوى ... و مرة تحس انه عدوهم .. مع انه متنيل على عينه متجوز ... و الغريب انى سمعته بودنى اللى هياكلها الدود بيقول انه حب مرة واحدة فى حياته .. و اتجوز مرة واحدة فى حياته ... و مفيش غير ست واحدة فى حياته .. فهمتهم حاجة؟
المهم .. قلت اخروش مع كلامه هنا ... هوا فين وانا فين  ..؟؟  ... ناخد راحتنا بقى .. هاسيب كلامه باللون الاحمر واخروش تحته فى الخباثة.


= ‏   الشخص الممل هو الذي اذا سألته كيف حالك اليوم حكي لك قصة حياته‏
-       يمكن يا اخى موش لاقى حد يكلمه و يسمعه .. موش لاقى حد يفهمو ازاى وامتى يتكلم .. يمكن وحيد ...يمكن طيب وغلبان جدا و مقهور من مراته مثلا .. بس معاك حق .. برضو ممل و رغاى


= ‏ علمتني الحياة أن أنام مع الكلاب وأسهر من الذئاب
-  قصدك عشان الكلاب وفية و الديابه ملهاش امان؟ ... امال بتعمل ايه  مع البنى ادميين


=  التعليم قد لايجعلك زعيما‏,‏ ولكنه يعلمك كيف تختار الزعيم‏‏
-       تصدق بالله؟ اتعلمنا او متعلمناش كده كده لا بقينا زعماء ولا قدرنا نختار زعيم ولا نقدر من اصلو نتنيل نعمل اى شىء.......... عارف ليه؟ .... لان اصلا اصلا مفيش تعليم  يا معلم


= ‏ ‏ العقل مثل المأثورات يجب أن ينفتح‏
-       لما بينفتح العقل يا خويا بيسبب فكر و صداع و جع دماغ .. ده اصلا لو الناس بقى عندها عقل


= ‏ الشعوب الهادئة ليس لها أبطال‏
-       يعنى الشعوب الثايرة عندها؟ حضرتك متاكد؟ .... الشعوب عندنا لازم تبقى هادية و هادية اوى  ... هادية جامد .. هادية خالص خالص .. لدرجة تحس انها جثة ميتة موش بتتحرك


= ‏ دفنت نفسي في نفسي فقد مات كل الذين كنت أحبهم
-       المشكلة اللى بنحبهم لما يموتو ... بيطلع ناس غيرهم بنعمل نفسنا اننا بنحبهم .. مع ان الحب اصلا بيموت لما بيموت اللى سببه .. موش ضرورى يموتو يعنى يروحو تجت التراب........... احيانا اللى بنحبهم بيموتو وهما لسه عايشين  و صاحيين ... بس بيكونو ماتو فعلا جوانا


= ‏  البخلاء ليسوا فقراء.. إنهم يموتون أغنياء
-       اه بيموتوا اغنياء ... بس كمان بيسيبو لنا ناس تضيع كل اللى عملوه البخلاء و تخلينا نضحك من غباء البخلاء .. لان اولادهم بيكملو نصف المهمة .. و يرجعو اهاليهم بخلاء و فقراء و اغبياء


= ‏  من عنده الجنس والمخدرات والفلوس.. له حاضر وليس له مستقبل
-       انا بسمع عن الحاضر و يمكن بسمع عن شىء اسمه مستقبل ......... لكن الصراحة اول مرة اسمع عن الجنس و المخدرات و الفلوس


= الكذب له حاضر والصدق ليس له مستقبل
-       ما كلنا بنكدب .. عادى يا معلم .......... قال يعنى لما بنبقى صادقين حد بيصدقنا ... الناس بتحب الكدب  يا عمنا لانه رخيص و موش بيكلف شىء


= ‏ ‏ الفقر.. أبوالجرائم والثورات
-       الفئر ابو الجرايم  اه .... لكن ابو الثورات ليه؟  اه فهمت فهمت ... قصدك يعنى بتحرض الفقراء يثوروا ........... إبقى قابلنى ... دى عالم فقر يا معلم موش بيقطع فيهم الكلام




الحب و سنينه
= ‏ مع الحب.. لا عقل.. .....  مع العقل.. لا حب
- عشان كده كلنا مجانيين   ....   مجانيين بس بمزاجنا  برغبتنا ... وسلم لى على العقل ... اصلا العيشة منغير تجربة مجنونة تبقى مالهاش طعم


= ‏ قلوب تحب‏:‏ قلوب صغيرة‏
-       صغيرة وهيا بتحب ... لكن ممكن الهباب الحب  يخليها قلوب عجوزة و متحطمة و كارهة العيشة واللى عايشينها .. انتا فاهمنى طبعا


= ‏ اذا كان قلبك لايدق للحب فسكوته أفضل‏
-       هوا عامل نفسه ساكت .. لكن مع ذلك بيدق  ... حد فاهم حاجة؟



= ‏ الحب‏:‏ هجوم‏...‏والزواج‏:‏ اكتساح‏
-       و الهزيمة مؤكدة


= ‏ الشيخوخة لاتنقذك من الحب‏,‏ وإنما الحب هو الذي ينقذك من الشيخوخة‏
-       طيب ايه اللى ينقذنا من الحب ؟ بلاش حد ينقذنا من الشيخوخة... لا مؤخذة يعنى ايه شيخوخة .!!؟


= ‏ الذين احبوا لم يموتوا‏...‏ والذين تزوجوا لم يعيشوا‏
- بالعكس .. اللى حبو ماتو و شبعوا موت ... و الدليل ان اللى اتجوزا بيدعوا على اللى حبوا .. يمكن غيرة و يمكن حسد .. الاكيد ان اللى اتجوزو موش بيقرو الفاتحة على روح اللى حبوا


= ‏ عقلي أول ضحايا قلبي
-       و موش اخرهم


= ‏ من حب عنيف وزواج فاشل.. يولد الشعراء
-       الحمد لله .. لا عندى حب عنيف .. ولا زواج فاشل ... ولا انا حتى شاعر ..... باى شىء


= ‏ إذا اشتعل الحب سنة.. سوف يظل رماده عشرات السنين
-       بس بشرط يكون اشتعال حقيقى ... موش صينى ... يسيب رماد يسيب وجع .. كلو محصل بعضو ..
-       بس لو اللى بنحبه طلع اونطة يبقى هننسى بسرعه... و يمكن نضحك على نفسنا لاننا كنا هبل


= ‏ أحسن الناس كلاما.. المحب الفاشل
- صح والله ... يفضل يسمعنا كل الكلام الحلو اللى مقدرشى يقوله قبل ما يفشل ... عالم مزعجة بجد



المرأة .. ملح الحــــياة
= ‏ من أعطتك قلبها.. أعطتك كل شيء بعد ذلك
- صح اعطتنا كل شىء ... لدرجة نسيت نفسها .. و بقت فقيرة من اى شىء .... بس ممكن سئوال؟ اعطتنا كل شىء ... واخدت ايـــــه  ؟


= ‏ لو أمسكت المرأة لسانها ساعة واحدة‏,‏ انقذت نفسها من الندم سنوات‏ ‏
-       ساعة بحالها ؟  يا راجل يا مفترى ... هوا  فيه ست تقدر تمسك لسانها و تسكت لمدة ساعه؟ .. ادينى قرص اسبرين من فضلك



= ‏ البنوك تريد فلوسك والدولة تريد حياتك‏..‏ والمرأة تريد الاثنين‏
- ولو معنديش فلوس ... و حياتى خلصت و بقيت كوهنة خالص ... الست هتتطلب ايه يا حدق ؟


= ‏ كل النساء في سن الاربعين يعانين من آلام الظهر ... والسبب انهن في الستين‏
- و كل الرجاله فوق سن الاربعين بيعانو من تعطل العقل ... والسبب انهم رجعو لسن العشرين .. اسكت بلاش فضايح


= ‏ اكذب.. أكذب سوف تصدقك المرأة
- عارف بنكدب ليه ؟......... لاننا لما بنقول الصدق بيتعبونا و يطلعوا روحنا....... و يمكن كمان عشان هما بيحبو اللى بيكدب عليهم ...... اللى يغيظ بجد انهم بيبقو عارفين انه كدب ........... ومع ذلك مبسوطين ... عالم غريبة


= ‏ عندي سبب واحد لمن يحب المرأة.. وألف سبب لمن يكرهها
- وانا عندى الاف الاسباب تخللى الستات تكرهك ........... و تحبك ..... لنفس الاسباب


= ‏ أحترم المرأة لأنها كذا وكذا.. وأحبها رغم كذا وكذ
-       المشكلة اننا لما بنحترم الست .. بيبقى صعب نحبها .. لاننا بنحترم حاجة محددة فيها ....  موش موجودة فى الست التانية اللى بنحبها
و لما بنحب واحدة........ موش بنتعب نفسنا عشان نحترمها .. ودى مصيبتنا يا رجاله


= ‏ المرأة تشتري ما لا تحتاج .. بفلوس لا تملكها .. لتلفت نظر من لا يهتمون بها
- فى جمبع الحالات بيطلع الراجل  لامؤخذة ............. حمار


= ‏ قل لامرأة أنت جميلة.. وسوف يكررها الشيطان ألف مرة
-       حتى لو موش جميلة  ........ الشيطان بيفضل وراها لما يقنعها انها جميلة .......... واشرب بقى يا باشا




الزواج ... وأخره
= ‏ الزواج هو نوع من الندم المنظم‏
- فى مرحلة غير منظمة بيبقى كده فعلا ... موش دايما يعنى ندم ... المهم كل شىء يبقى منظم و مرتب و مظبوط ...... الا المشاعر دى سيبها بقى ماشية على حل شعرها ........ بين الازواج قصدى


= ‏ لاشيء أسوأ من الزواج الا الطلاق‏..‏ ولاشيء اسوأ من الطلاق إلا الزواج مرة أخري
- الكلا ده للستات والا للرجاله ؟  يتهياللى الاولانية للستات ......... و التانية للرجاله ... والله اعلم


= ‏ أنت لست في حاجة الي أن تتعلم الحب‏,‏ وانما أنت في حاجة الي أن تتعلم الزواج‏
- يمكن لان الحب عامل زى المشى على الرجليين ... حاجة بالفطرة يعنى ......... و الجواز عامل زى قيادة السيارة .. ليه شروط كتير .. و اولها...... رخصة سواقة يا اسطى ... بالمناسبة حضرتك بتعرف تسوق؟


= ‏ س: ‏هل الاذكياء ازواج ناجحون؟ .... ج : لا .... والاذكياء لايتزوجون‏
- انتا بتسال و تجاوب على نفسك؟ الله يخرب بيتك .. يعنى انا طلعت غبى على كده


= ‏ س: أدخل كلمة زواج في جملة مفيدة ... ج: لم يستطع أحد
- مين قال  لم يستطع احد ............ كل اللى متجوزين يقدروا يا معلم .......... بس بيقولو الجملة لنفسهم والله اعلم بالنوايا


= ‏ يظل الرجل ناقصا حتي يتزوج.. فإذا تزوج اكتملت تعاسته
-       ناقصاً ايه ...؟ يعنى الجواز هوا اللى هيكمله حاجة؟  ... يمكن كان ناقصه واحدة تنكد عليه مثلا؟
-       لو تجوز تكمل تعاسته ... لو كان اختياره بايظ  و غلط ....... او هو اصلا كان غلط .. يبقى يستاهل  اللى يجرى له


= ‏ أن تكون لك عدة زوجات هذا كثير.. وأن تكون لك زوجة واحدة هذا كثير جدا
- طيب انا عندى زوجة واحدة ........... امشى بقى غور من وشى ... انت كلامك كتير جدا


= ‏ السياسة: فن الممكن.. والزواج: فمن المستحيل
- و الحوار مع كلام حضرتك  النهاردة هنا........... هى خلطة فاشلة بين الممكن و المستحيل



تحياتى / عمر المصرى،

الثلاثاء، 23 مارس، 2010

الخروشة الخامســــة ... كيف تفهم المرأة

المرأة .. المخلوق الجميل .. الرقيق .. الناعم .. الحنون ... الشرس احياناً ... الغامض غالباً ...  المحير دائماً
متقدرشى تتجاهل  حضورها... و متقدرشى تستغنى عنها... و متقدرشى كمان تستحملها كلها على بعضها .. يمكن احنا يا رجاله بنبقى طماعبن  او انانيين...   عايز الحاجة الحلوة فيها  فقط...



هل حاولنا مرة نستوعبها على بعضها .. هل حاولنا نفهمها؟؟؟  ده السئوال المهم

دول شوية صور معبرة جداً ..  معبرة اكتر من بلاغة اى قلم،  كل صورة ممكن لو دققت شوية اكتر  هتفهم شىء جدبد مكنتش تعرفه من قبل .. نحاول نتعرف من جديد عليها .. و نحاول نفهمها.. وربنا يوفقنا او يجيب العواقب سليمة .. يلا  نشووووووووووف





ممكن تفتكر من الصورة دى انها مجرد اداة ... لكن دقق شوية هتفهم شىء تانى








الصورة دى هى شكلها مقيدة  .. لكن لا تعرف سر ابتسامتها











دى طبعا علامة فيكتور  او علامة الانتصار ... طبعا تبقى غبى لو مفهمتشى انتصار ايه وفين وليه










هنا طبعا حضرتك هتتلخبط فى الجزء الحلو فى الصورة ... ويمكن ماتخدشى بالك من المعنى بالظبط ... 








دى بقى اشهر تفاحة ... موش تفاحة الخامسة طبعا ... دى تفاحة حواء  يا معلم ... كل التفاحة ... و نجييلك بقى فى المسرات







بما انك ااكلت التفاحة .... استحمل بقى يا معلم  ........  اولها  ..  لوى ذراعك








هنا بقى هيا موش عايزة منك الا تساعدها عشان تخترع معادلة رياضية جديدة اسمها ... 1+1=4 .. أشهر معادلة قابلة للتعديل عند الستات








شوف بقى لما حواء تختار تقعد فى المكان الغلط  وتبين لنا سعيدة شوية  ... حاجة تجنن فعلاً








وهنا تحس انها قامت بدرونا يا رجاله .. او ظروف معينة خلتها راجل و ست فى وقت واحد











انا ماليش دعوة بالصورة دى   ... انا ايدى مغسولة و زى الفل 







            حصل خير حصل خير ...  متدقشى اوى .. فوت فوت





            الغريب ان العصفور شكله موش مستغرب زينا .. ربنا يشفى













            هى عايزة تقول لنا حاجة .. بس موش فاهم لسه عايزة ايه؟








            بيكاسو  ذات نفسه ملك التكعيبية و الشخبطة و اللعبكة .. موش هيفهم اى حاجة زينا








بتنده عليك .. ايوا انت يا خفيف ... موش انا














و ماسك لك مرايا كمان .. يعنى شيفاك بلاش هروب بقى













سبحان الله ... يحسسوك انهم ضدك وضد الجاذبية الارضية كمان .. ربنا يهد القوى









شوفو بقى يا قوم انا تعبت من التعليق على كل صورة .. دلوقتى شوفو الصور اللى جاية و علقوا بينكم وبين نفسكم ..  و منتظركم عند اخر صورة تحت فى اخر التدوينة


















































































































حمدلله  على السلامة ... وصلتم لهنا بخير؟ ... اهلا وسهلا  خدوا أنفاسكم بقى بعد العلقة دى 
كيف تفهم المرأة ... ده عنوان الخروشة اليوم ... بس لو صدقتونى بجد وحاولت تفهموا الستات ؟؟  روحو  بصوا فى المرايا الان ... هتلاقو نفسكم شبه الراجل اللى فى الصورة اللى جاية دى












تحياتى / عمر المصرى،
ملاحظة: اضغط على اى صورة عشان تشوفها بحجمها الكبير يا معلم

إجمالي مرات مشاهدة الصفحة