السبت، 7 أغسطس، 2010

الخروشة الــ 31 ــ الفيس بوك وسنينه .. الجزء الثالث


الخروشة الــ 31  ــ  الفيس بوك وسنينه .. الجزء الثالث


الجو حار ... و الاوكسجين قليل ... و المخيخ كسلان .... و السيكلوجى مبطط .... والكسل غالب ... و الانتخة مسيطرة

حد فاهم حاجة من كلامى؟

ولا يهمكو يا بشر.... عيشو  شوية مع عالم الفيسبوك و خصوصا الجروبات المصرية .. اللى تجنن اى حد ... أجيال جديد والقلم فى ايدهم زى البندقية احيانا و زى الوردة احيانا ... وغالبا كلها اقلام مجنونة ... هانشر لكم اخر حاجات وصلتنى على الفيس بوك من يومين ...... وعيشوا بقى شوية تهييسس ... قبل حلول الشهر الكريم و أدآبه ... و كل سنة وحضراتكم طيبين و رمضان كريم على الجميع

تحياتى / عمــــــر المصـــــــــرى







متى تكون البنت عبيطة‏

بعض المواقف التى تقع فيها الفتاة و تستحق بها عن جدارة و استحقاق لقب ( عبيطه )

1- حينما تفتح قلبها لأى امرأة لا تعرفها و تحكى لها أدق تفاصيل حياتها من أول مرة تلقاها فيها.

2- حينما يرتفع صوتها فى الكلام أو الضحك أمام الناس : فمن الممكن أن تكون جالساً فى مكان فتسمع صوتاً تحسبه سارينة الحريق فإذا بك تفاجئ أنه صوت امراة تضحك

3- حينما تلبس ملابس غير محتشمة ليس على سبيل قلة الأدب و لكن على سبيل الحمق و التقليد الأعمى : فقد تجد فتاة سمينة جداً ترتدى بنطالاً من الجينز الشديد الضيق مما يجعلها تبدو مثل شوال البطاطس

4- حينما تضيع عمرها و وقتها فى ما لا يفيد كالكلام فى التليفون أو المكث بالساعات أمام التليفزيون أو الكلام فى الهاتف أو بتضييع الساعات أمام المحلات و الفاترينات لأجل أن تشترى توكة بربع جنيه

5- حينما يأتيها ابن الحلال الطيب المناسب فترفض بغرض إكمال تعليمها لأن الشهادة سلاح فى يد المرأة ثم فى النهاية تأخذ هذا السلاح و تبله و تشرب ميته

6- حينما تعطى أذنها لكل من هب و دب حتى لبائعة الجرجير .

7- حينما تكون شخصيتها ضعيفة تترك قيادتها لأى إنسان طيب أو شرير

8- حينما تكون خفيفة غير متزنة تضحك لأتفه الأمور و ترقع بالصوت لأنها رأت خصلة من شعرها على السجادة ثم تقول بعد أن تهدأ : أصل بحسبها صرصار .

9- حينما تترك الجهل يعشش فى خلايا مخها و لا تحاول تثقيف نفسها لا دينياً و لا دنيوياً فهى لا تعرف أى شيء فى أى شيء و قد يكون الحمار- و لا مؤاخذة - مثقفاً عنها

10- حينما يكون أكبر همها هو الزينة و اللبس

11- حينما تصدق كلام شاب يسرح بها و يفهمها أنه يحبها و خاصة إن كان زميلها فى الكلية ، فى حين أن كل شاب يأنف أن يرتبط جديا بفتاة أخذ منها معظم ما يريد فتصدق حتى من يقول لها : أنا باحبك يا انشراح و بعد أربع سنين لما أتخرج حاشتغل و أحوش و أعمل مشروع و آجى لبابا أخطبك و أنا إيدى مليانة المهم دلوقتى تعالى نعيش حياتنا

12- حينما تترك نفسها للشيطان و تتزوج عرفياً فتضيع نفسها و تحطم أهلها

13- حينما تسرح على المنتديات و تقضى فراغها بالدخول فى المواقع التى تخاطب فيها شباباً من باب تضييع الوقت ثم يحدث ما لا يحمد عقباه

14- حينما تطلب من عريسها ما ليس فى وسعه و تكلفه فوق طاقته ( كاتشين ماشين – غسالة أطباق – نجف – ستاير– خلاط مستر براون – دباديب كتير – ميكروويف– ديب فريزر - كورن فيليكس – شيش طاووك !!!!!!!! ) و ممكن يكون فى بيت أبوها معندهومش بوتاجاز أصلاً

15- حينما تعتبر نفسها نداً لزوجها و أن رأسها برأسه و أننا نعيش فى عصر المساواة و حرية المرأة إلى آخر هذا الكلام العبيط فتقول له : أنا سمعت امبارح فى البيت بيتك إن أنا زيي زيك و أنك مش أحسن منى ، و من هنا ورايح أنا حاغسل المواعين يوم و إنت تغسلها يوم

16- حينما تنقلب حياتها رأساً على عقب لما ترى حلماً عبيطاً لأنها تظن أنها شفافة و أحلامها دائمة التحقيق فتقول لزوجها مثلاً : أنا حلمت إنك بتخونى مع الشغالة لازم تطلقنى ، مع إنهم معندهومش شغالة أصلاً

17- حينما تؤكد أن كل صداع يصيبها أو دوخة ما هى إلا عمل و جن و لبس و سحر فتجبر زوجها على أن يذهب بها إلى الشيخة سمحانة أو الشيخ الزغربانى اللى سره باتع

18- حينما تقيم الدنيا و لا تقعدها إذا تأخر حملها أسبوعاً كاملاً بعد زواجها (بكاء – هيستريا - تحاليل + أشعة + دكاترة + ... إلخ )

19- حينما تحكى كل شيء عن بيتها لأمها و أختها و صديقتها : بخيل و جلدة و مش راضى يشتريلى فستان بمناسبة عيد العمال

20- حينما تصاب بالغيرة العمياء و تشكك فى كل قول و فعل لزوجها : طلقنى ...أنا شوفتك بعنيى بتتكلم مع الولية بتاعة العيش و بتضحكلها ليه ( مع أنها امرأة عمياء كسيحة تجاوزت الثمانين )

21- حينما تتبسط لدى أقاربها الرجال من غير المحارم ( إبن خالة ماما – إبن عمى – إبن خالتى – جارنا القديم – زميلى لما كنا فى الجامعة ) متبقاش معقد كدة خليك لارج

22- حينما تهمل فى أولادها لصالح عملها ( لازم اثبت ذاتى فى الشغل )

23- حينما تصاب بداء التطير و الخوف من الحسد إلى درجة المرض فتقول : القطة السودة عدت من قدام باب الشقة يبقى نهارنا إسود مفيش خروج النهاردة

24- حينما يكون ( من سيغنى فى فرحها ) أهم عندها من العريس نفسه ، أى واحد و خلاص ، لازم تجيبلى المطرب العاطفى ( نبيل عضمة ) يا إما كده يا إما مفيش جواز ، الواحدة متتجوزش أحسن ما يتعمل لها فرح أى كلام

25- حينما تكد و تتعب فى عملها ثم تعطى ما قبضته للحضانة و المربية

26- حينما تتزين خارج بيتها و تتعفن داخله

27- حينما ترفع صوتها على زوجها و تغضبه

28- حينما تتوقف عن تطوير نفسها و تتحجج بانشغالها بالأولاد

29- حينما تجعل البيت سيركا و لا توفر لزوجها سبل الراحة فيه

30- حينما تكون مسرفة مبذرة

31- حينما تقارن نفسها بالأغنى منها مالاً لا بالأتقى و الأعلم و الأكثر تدينا و خلقا


يارب ابعدنا عن العبط واجعلنا من العاقلين ياارب











تفرقة عنصرية بين الولد والبنت

أولا :-

طبعا وانتا بتوقف الميكروباص وياسلام لو مافيش مكان

لو انت بنت يادوب تبصي بس بصة استعطاف لأي بأف قاعد هايقوم ينط يعد في ضهر السواق عشان تعدي

انما بقا لو انتا ولد شوفلك اي حتة اترزع فيها او انشالله تتشعلق مانتا اساسا مالكش أهل يخافو عليك

ثانيا :-

طبعا وانتا طالع كتير مننا ممكن يخبط راسه في الباب

طبعا لو كنتي بنت هاتلاقي اللي بيقولك خير حصلك حاجة ؟؟؟ من كل الركاب وممكن طبعا
تلاقي اللي ممكن يقوم يضرب السواق

انما بقا لو كنت ولد... اسمع بقا اللي يضحك عليك واللي يقولك ايه اتعميت ؟؟ .. يا لطخ تستاهل شوف كنت بتبص فين والكلام دا طبعا

ثالثا :-

وانتا بقا بتقفل الباب وطبعا السواق بيقولك اقفله بالراحه كأنه هايتكسر في اديك مانتا بقا رامبو

طبعا لو كنتي بنت وبتقفلي بالراحه خالص وممكن الباب مايتقفلش يقولو شوفو الرقة حتى الباب مش هاين عليها تخبطه بالجامد

وياعيني عليك لو كنت ولد والباب ماتقفلش .. ايه ياعم النايتي مش قادر تقفل الباب اتفو على دا جيل

.... ولو قفلت الباب بالجامد بقا

لو كنتي بنت طبعا هايقولو معلش اكيد متعصبة شوية ربنا يعينها على اللي هيا فيه

انما لو كنت ولد : ايه الطور دا خلاص ياعم عرفنا انك فاندام بس بالراحه ع الباب


رابعا :-

طبعا ممكن يجيلك تليفون وانتا قاعد في الميكروباص

لو انتي بنت وانتي بتقولي الو ياسلااااام الله يا جماعه على صوتها شوفو الرقة يابخته المحظوظ اللي بيكلمك ولو معاها موبايل معفن ياسلام ع التواضع

انما بقا لو كنت ولد اللهي يجيلك ضربة انتا واللي بيرنلك دلوقتي وطي ياعم صووت ام صوتك صرعتنا والله عرفنا انك معاك زفت موبايل ولو الموبايل معفن .. وكمان بتتعايق بموبايل معفن امال لو كان موبايل عدل شوية كنت عملت ايه




خامسا :-

لو انتا بقا طالع والسواق مشغل اغنية بيئة ومعلي الصوت بقا وانتا عايز تتكلم في الموبايل


طبعا لو انتي بنت القانون بيديكي الحق الكامل انك تقوليله وطي الكاسيت او اطفيه ( قانون ساكسونيا طبعا)

انما لو ولد هاتلاقي السواق من غير ما يرد عليك يادوب يبصلك بصة بقرف ويلف وشه تاني ويعلي الصوت كمان ويفضل يبرطم بقا انتا هاتشترينا بأم النص جنيه اللي هاتدفعه

سادسا :-

طبعا بقا انتا وصلت الحمد لله بعد القهر والتفرقه العنصرية اللي اتعرضت ليه طول الطريق عايز تنزل بتقول للسواق على جنب وطبعا لايمكن هايسمعك ماهو مشغل الاغاني ومعلي الصوت على اخره

طبعا لو انتا ولد هاتقول مرة واتنين وعشرة وينزلك بعد الحتة اللي انتا عايز تنزل عندها بشارعين تلاته وطبعا هايقولك ماسمعتكش مانتا اللي صوتك واطي زي البنات

انما بقا البنت يادوب كل اللي هاتعمله انها توشوش نفسها على جنب وكأنها بتكلم نفسها
هاتلاقي بقيت الاربعتاشر نفر اللي قاعدين في الميكروباص بصوت واحد بيقولو للسواق على جنب ..... انتا اطرش ؟؟؟











نصائح وفضائح....‏

 جالك عريس متقوليش لحد من صحباتك
؛الحاجات دي بتتنظر وأنتي عارفه البنات عينيها وحشة

*لو واحدة من صحباتك جبتلك عريس إوعي تشوفيه أو توافقي عليه

لوكان عدل كانت هى خدته

*هتقولي طب لو متجوزة أقولك هتبقي عاوزاكي تاخدي واحد أقل من المنيل جوزها

*متفضحيش الدنيا أما يجيلك عريس أصبري شوية لما تمسكيه كويس هتسيّحي لنفسك ع الفاضي وتتحسب عليكي خطوبة

*في أول مقابله لو لاقيتيه بيبص ف ساعته ..قاعد مش على بعضه.. وشه إتخطف
وبان عليه خيبة الأمل إعرفي إنك معجبتيهوش .. إسبقي إنتي وقولي إنك رافضاه
متخليش واحد زي ده يقول أنه مش عاوزك

متزعليش عليه ولا على غيره.. الرجالة زي الأتوبيسات واحد عدّى التاني جاي وراه

كمان الرجال زي الدبان هتهشي واحد هييجي عشرة غيره

* الرجالة زي المطبات كل ما تفتكري خلصت منهم هتقعي في مطب جديد مش عاملة حسابه

*لو معجبتيش أكتر من واحد إوعي تحسي بالإحباط . بكرة هيجي اللي أحسن منهم إلا ما كان واحد..فيهم عدل

*مهما كنتي وحشة متقلقيش فيه اللي أوحش منك وإتجوزوا عادى

-بعد الخطوبة

*بصي ..عذبيه.. الراجل يحب يتعذب البنت السهلة يدوبك يفكر فيها يومين ويدور على غيرها

*إوعي تقوليله بحبك أو عينيك عجباني الراجل ميحبش كده أبدا

*إوعي تروحي ميعاده قبله حاولي تتلكعي تروحي بعده بربع ساعه أو نص ساعه الراجل لو إستناكي هيتعلق بيكي أكتر

*لو سألك عرفتي حد قبلي قوليله لا حتى لو كنت مصاحبة شباب مصر كلها

*لو حاول يوقعك ويقولك بحب الصراحه وكده، برضه خليكي ناصحه أنتى عمرك ما عرفتي راجل غير باباكي واخوكى لو ليكى اخوات شباب طبعا

*هيقولك هسامحك وده ماضي متصدقيش برضه الرجاله قلبهم أسود وهيمسكهالك ذله العمر كله

*إحترمي أهلك متغلطيش فيهم قدامه حتى لو كانوا بيئة وربش علشان ميتجرأشي عليكي وعليهم

*هيقول إذا كان أهلها بتعمل معاهم كده هتعمل معايا ايه؟ هيعملك فيها مصلح اجتماعي حبيب امه

*بلاش زن ورنات تليفونات ورسايل حب وغرام دول عالم .... مش هيقدر الحاجات
دي هيتغّر ويفتكر نفسه أحمد عز وهو زي ما إنتي شايفاه قومي بصي لصورته ع
الموبايل

*خليكي زي فوزية إوعي يمسك إيديكي هيطمع فيكي ويفتكرك واحدة من إياهم ،يرضيكي واحد ملوش لازمة زي ده يفتكرك واحده من إياهم

سيبيه يرغي براحته وعدي الفشر اللي هيفشره عن البنات اللي دايبين فيه دوب
إعملي إنك مصدقاه مع أنك عارفه إنك لولا خايفة لا تبقي عانس مكونتيش
قبلتي بواحد زيه

*خليكي دايما في أحسن صورة هيقولك بحبك تكوني على طبيعتك بحبك من غير
ماكياج متعمليش كده لأنه بيتلاءم عليكي عاوز يعرف أنتي حلوة فعلا وإلا دي
بويه ..خليه على عماه  ................ احنا ما صدقنا وقعناه











تعرف أيه عن الليل؟؟؟؟ على طريقة  تعرف أيه عن المنطق  يا مرسى  ؟

واحده هى وجوزها قاعدين بليل فى الطراوة كده وعايزاه يقولها كلام حلو فبتسأله   (تعرف ايه عن الليل ) ؟


قال صاحبنا لما حب يعرف الليل لمراته..

الليل سكون .........  والسكون راحة .........   والراحة أهم حاجة للإنسان

والإنسان اسمه كده عشان بينسي .........   والنسيان نعمة للبني آدم الضعيف

والضعف عكسه القوة .........   والقوة عزيمة  .........  

والعزيمة مختلفة من بني آدم للتاني  .........  يعني ناس بتعزم بسيجارة وناس بتعزم بسندويتش جبنه

والجبنه من النواشف وجاية من حليب المعيز والمعيز تربيها الستات

والستات ناقصات عقل ودين ويحبوا دايما السوق والمكياج

والمكياج نعمة للرجالة يرحمهم من المناظر اللي لا تسر عدو ولا حبيب

والحبيب بني آدم حلو من أهلي

والأهلي غلب الزمالك سته صفر

والصفر درجة التجمد للمياه  .........  والمية سر الحياة

والحياة بدونك سراب  .........   والسراب عكس الحقيقة

والحقيقة المرة  .........   اني عايز أنام دلوقتي

غوري من وشى






ممكن سيجارة !!‏

محشش عايز يأجر بيت ونصحوه بأنة ميأجرش البيت دة لانه فيه جن يخوف بس ما سمعش كلامهم واجره

بالليل بقي.. قام الجن و قال لزمايله هطلع اخوفه وارعبه

طلع الجن و قعد جنب المحشش وقاله ممكن سيجارة ؟

بص له المحشش وقال إتفضل

نزل الجن عند زمايله وهو متغاظ وقالهم ما خافش ؟؟؟

رجع الجن نتف نفسه وخلى الدم يشرشر من جلده وطلع عند المحشش وقاله ممكن سيجارة؟

بص له المحشش وقاله إتفضل

انجن الجن ونزل لزمايله وقالهم المره دى هموته من الرعب ....

قام شال عينيه  ....  ولف راسه ....   وكسر ايدة  ....  وطلع عند المحشش وقاله ممكن سيجارة ؟

بص له المحشش و قاله إتفضل

هنا الجن طلعت فى راسه نخله وطار عقله وضغطة اترفع ونزل تحت وبهدل نفسه بهدلة

وطلع العامود الفقرى  ....  وخلى جلده مشرشر  ....  وقلب عيونه  ....  وطلع عند المحشش

وقاله : ممكن سيجارة ؟!

بص له المحشش ببرود .. وقاله :  أنت حمار؟ .. مش ملاحظ أن التدخين بقى يدمر فى صحتك؟






و إلى لقاء فى خروشة جديدة بأذن الله
تحياتى، عمـــــر المصـــــرى
omar.almasry1@gmail.com


























إجمالي مرات مشاهدة الصفحة