يعود بعد غياب .. صاحبنا الاول .. و يدلف بهدوء الى الغرفة .. بينما صاحبنا الثانى سبقة بلحظات بسيجارته البشعة .. يحمل الاول تحت إبطه لوحة كبيرة مغلفة بورق لحمايتها ... و بدأ كمن يحمل شيئاً مهماً و ثمينا و يخشى عليه .. بدأ فى احتساء قهوتهما وكلا منهما ينظر للاخر بتوجس كانهما على حافة شجار او تحدى او عتاب على أقل تقدير لمن يراهما الان .. ويبدأ بينهما الحديث
= السلام على من اتبع الهدى
- و عليكم السلااااااام ... هل هلاك يا راجل يا طيب ........... ايه الغيبة دى ؟
= حفظك الله رفيقى و نصفى الطيب ... فقط انشغلت بامور كثيرة ... وشغلتنى امور اكثر عن الحضور ... و تركت لك خروشاتنا .. لتصول و تجول
- ياعم انا منغيرك برضو مينفعشى ارحرح و اخد راحتى ... كنت حاسس انى بكلم نفسى هنا ... وحدانى يعنى
= بالعكس، انت قدمت ما أثار اعجاب و حفيظة الناس معاً .. الغريب ان فى خروشاتك الاحادية ... استغليت الفرصة و نشرت خروشتين .. قد يبدوا للناظر انهما للتسلية ... لكنى افهمك جيداً... فأنت قصدت متعمدا و بطريقة غير مباشر كعادتك، ان تهاجم بنات حواء .. مرة بالصور و التعليق و مرة باستنباط حوار تخيللى مع كلمات مفكر و فيلسوف واديب بحجم الاستاذ انيس منصور .. ويبدوا انك تحسباً لردهم القاسى عليك، ............ قد سبقتهم باغلاق خاصية التعليق للزائرين
- بقولك ايه؟ الحكاية موش نقصاك .. انا اكتب براحتى لا مؤخذة .. ولا خايف منك ولا من الستات .. كده كده .. هما اصلاً موش بيعجبهم العجب ... واى راجل يطبطب عليهم يبقى غلطان ... الناس دى يا معلم ناس غريبة .. لو جريت على رضائهم هتتعب ائوى
= لك حرية القول و الكتابة .. لكن لا تثير علينا ضغائن ... يكفينا ما عانينا منهن لسنيين طويلة .. تعلمنا شيئا مهما انا وانت ... تعلمنا انه من قبيل التهور ان تهاجم بنات حواء... فهن يستعذبن ذلك وإن أظهرن غضبا و حنقاً لكن .. ستتفاجىء ان هجومك عليهن واستفزازك لهم ايضا يسعدهم.. و يعطيهم اهمية مضافة .. لا تنس انهن النسمة الرقيقة الطيبة الحنونة فى حياتنا الخشنة ... ولا غنى عنهن باى حال. ... يا رجل أتجوز لنا ايامنا بعيد عنهن؟ .. أيحلو لنا العيش بدونهن !؟ .. فمن قبيل الرصانة و التحسب و الكياسة و الذوق .. رفقاً بالقوارير يا رجل
- قوارير؟ قول مسامير ... قول بهاليل ... قول هم تقيل .... قول زى ما انتا عايز ... ربنا يجعل كلامى خفيف عليهم .. بقولك ايه سيبك منهم بقى ... ربنا يهدينا و يهديهم ... ايه بقى اللى انتا شايله النهاردة ده؟
= هذه لوحة احصائية
- نعم يا اخويا؟ احنا فتحناها مدرسة والا هتقدم نشرة الاخبار؟
= لوحة احصائية سوف تسبب لك الم .. وتسبب صدمة للاخرين ... لنعرف اين نحن كأمة عربية فى هذا العالم الفسيح
- شكلك ناوى تعمل فضيحة
= إحسبها كما تشاء .. فهى ليست فضيحة بقدر ما هى إفاقة لنا .. حتى نعرف اين نحن
- إحنا فين؟
= أصبت ............ هذا مقصدى اليوم
- طيب يا سيدى فرجنا .. ورينا ... و ربنا يستر بقى
= ساضع اللوحة الاحصائية التى نشرت نهاية العام الفائت سأضعها امامك و امام الناس على الحائط .. و لكى يروها بشكل واضح انصحهم بالضغط المذدوج على الصورة .. وبعدها نبدأ فى تحليلها .. حتى نصل لشىء
- اتفقنا .. قوم اخبطها مسمارين على الحيطة .. عشان نشوف كويس .. وكل واحد يقفش الماوس بتاعه عشان يشوف الصورة
= ها هى امامك الان بكل وضوح .. ماذا لفت نظرك ايها العجوز المتهالك ؟
- عجوز ؟ فشر .. يا راجل يا نكد
= أخبرنى بما فهمت
- اول حاجة فهمتها ان المخروبة الكورة الارضية عليها الان اكتر من 6.7 مليار جثة .. و احنا يا عرب تقريبا 330 مليون مفعوص
= تقريباً نحن أقل من 5% من عدد سكان المعمورة ... و مع ذلك صوتنا عال .. و مزعج احيانا . مزعج لانفسنا و ليس للاخرين بالضرورة ... لانى احسب ان صوتنا داخلى.. لا يخرج لهم فيسمع باحترام
- تانى حاجة فهمتها ان كل المخاليق العرب اللى على الزفت النيت .. بيهرجو اكيد .. ولازم يتكسفو من الارقام دى .. ويبطللو تهييس و هرتلة
= صحيح كلامك ... حتى فى ال 20 دولة الاوائل فى استخدام شبكة المعلومات لا يظهر اسم بلد عربى واحد للاسف الشديد
- تالت حاجة فهمتها ان الجماعه بتوع الكوبى و التقليد .. دول ناس موش هينة .. يخرب بيتهم، دول تقريبا ربع المخاليق اللى على الارض صينيين
= صحيح .. 21% من سكان الارض من بلاد الصين .. التى اوصِينا من مئات السنيين ان نطلب العلم هناك .. لكن من يسمع؟
- يا نهار اسود .. اللى بيستعملو النيت فى الصين 360مليون .. والعرب كلهم 330 او 335 مليون، الله اعلم كم واحد فيهم بيستعمل النيت و كام واحد بيستعملو صح .. الله يفضحك يا شيخ
= دقق اكثر وسوف تصدم اكثر... فتمتع ايها المتهالك
- الغريب ان امريكا 307 مليون واللى بيستعملو النيت 227 مليون يعنى تقريبا تلت تربع الشعب هناك شغال اون لاين.. تعرف اللى فاقعنى ايه؟
= قل .. فضفض ... ماذا يؤرقكك بعد كل هذا؟
- حسب معلوماتى من قعدات القهوة و شوية المجانيين اللى بقعد معاهم ان العالم فيه 191 دولة .. بس يظهر العدد فى اللمون
= كيف يا رجل
- أأقصد اذا كان 20 دولة .. فيهم 76% من اللى بيشتغلو نيت و اون لاين ........... امال بقية المساخيط اللى باقى 170 مخروبة بينيلو ايه ..؟
= لا تحسب ان كينونات الامم و مقامها و تأثيرها يحسب بقطعة قماش مزركشة ترفرف امام مبنى دولى .. يضمهم جميعا ... فتلك دولة يمثلها رقم فقط .. مجرد رقم تسلسلى
- دول عواله بقى ... يعنى حمل على الناس المحترمة ...عارف اللى غايظنى فى الكشف بتاعك ايه؟
= ماذا؟
- ايران
= ولما؟
- يا خويا بص فى الكشف و هتفهم يا حدق... دى طلعت نمرة11 ... واحنا اصلا مفيش ولا اسم مخروبة واحدة مكتوب
= لن اضايقك بايران... يكفى ان أقول لك ان عدد سكانها أقل سكان بلادنا المحروسة .. و البين شاسع كما ترى
- الله يكسفك يا شيخ .... كمان فيتنام؟
= تلك بلاد سكانها اكثر منا عدداً .. و خاضت اشرف معركة ضد اعتى جيش لسنوات طويلة... الغريب لم تنكسر والاغرب انها قهرتهم .. و الاكثر غرابة ... انها سبقت الكثيرين كما ترى
- انت بنى ادم لئيم .. وعايز تعقدنى من العيشة واللى عايشينها ... الله يسامحك .. طول عمرك موش ساهل ... و دايما بتطلع ليا زى كلكيعة الضمير .. تقعد تنخز و توجع .. و تفوقنى ... خلتنى اتكسف اوى من الهباب الكشف بتاعك ده
= صديقى و رفيقى و نصفى الطيب البدائى البسيط .. ذكرت لك منذ زمن طويل انه من المستحيل قبول دواء بدون الامساك بالداء
- تانى الموضوع ده؟
= ثان وثالث والى الابد ساذكرك بها ... كيف ستأخذ اقراص اسبرين مثلا .. دون ان تعترف انك مريض و تشعر بالصداع؟
- صداع بس؟
= ااقصد ببساطة ان البشر داخل منظومات الامم و الجماعات و الاسر و العائلات .. وحتى الشخص المفرد المتوحد بذاته .. لابد ان يعرف ماذا ينقصه .. حتى يتمتع بما يملكه .. علينا ان نفيق يا صديق ... فلهم طريق و لنا طريق .. و هكذا لا تستقيم الامور كى نلحق بهم .. اما تموت .. و اما تفيق
- انا موش مريض ولا عيان و صحتى زى الفل ..
= حسناً... فماذا تحس الان
- الصراحة؟ حاسس بالكسوف اوى يا معلمى
= صدقتْ ... عندما ننظر فى المرآة ... سنعرف من نحن .. واين نحن
- بجد بجد بجد .......... حاجة تكسف .. انا كنت خلاص هاروح ااشيت شوية و ارقع لى أصيدتين شعر ... والا انزل كام كليب و شوية اغانى همبكة على شوية صورة و شوية برامج مسروقة......... و اهوا كله دوت كوم.... و السلام
= تتحدث عن نفسك ايها اللئيم ام تتحدث عمن يقرأ لنا الان ...!!؟
- بلاش تزعل الضيوف الله يكرمك ... انتا طول عمرك كده ... راجل نكدى و كيفك تعكنن عليا .. وتخللينى افكر و اهرش دماغى و اتغم ... اقفل اقفل الهبابة دى..... خلينا نروح نهيس شوية وننسى الفضيحة
= ليكن لك ما شئت ... فى رعاية الله و حفظه و نلتقى بكل الخير عما قريب .. و تحياتى لمحبيك واسرتك..... و شاغلى عقلك...... و مضيعى وقتك
- انا عارف اليوم ده من اوله موش مظبوط ... انا كنت بخروش براحتى و لوحدى ... رجعنا يارب لوجع القلب تانى...!؟
تحياتى / عمر المصرى،
